Framifrå jobb!
Tusen takk for innsatsen til alle dykk som tok del i årets Husnes Cup. Cupen vart vellukka. Lagleiarmøte gav oss 99% positive tilbakemeldingar. Dei gjekk på at alt fungerte så fint. Det hadde det ikkje gjort utan at alle frivillige møtte til rett tid, tok dei rette jobbane og rapporterte i dei rette kanalane. Framifrå jobba!
Berre søndag passerte vi 70 personar på dugnadslista. Når vi tel skikkeleg etter, har tett på 150 unge og vaksne vore involverte i ulike oppgåver til cupen. Det tykkjer eg er utruleg flott. Dugnadsånda lever i Triofotballen!
Mange prestasjonar har imponert meg i samband med årets cup. Alle dei frivillige som melde seg til teneste utan å bli spurde. Alle dei vi trudde vil stilla opp, som gjorde det gong etter gong, og ikkje minst dei som seier ja så snart dei høyrer kva det gjeld. Eg lytta meg til eit resonnement frå ei kone då ho ropa på mannen; - det er til deg, det er sikkert Husnes Cup snart!
Nett den kommentaren fortel litt om at vi har mange som veit om, tenkjer på og ventar på Trio, utan at vi sjølve veit om det. Det er utruleg godt å vita!
Utan å nemna nokon særskild, for då ville eg gjera andre urett, ønskjer eg å takka for den flotte måten de har vore med på å profilera Trio-fotballen, Husnes Idrettspark og Husnes samfunnet. Vi kan når vi vil, og vi blir fleire og fleire som vil endå meir!
Vel blåst!
Svein Røyrvik - Leiar IL Trio fotball
| 
